RC Katavi asisitiza Wananchi kutunza akiba ya chakula kujihadhari na ukame.

Posted on: November 24th, 2022

Mkuu wa Mkoa wa Katavi Mhe.Mwanamvua Mrindoko ameendelea kuwasisitiza Wananchi Mkoani humo kutunza akiba ya chakula ili kuchukua tahadhari dhidi ya Ukame.

Bi.Mrindoko ametoa rai hiyo katika kikao cha Bodi ya barabara kilichoketi 23 Novemba 2022 kujadili utekelezaji wa Taarifa za utekelezaji wa shughuli  mbalimbali  katika Sekta ya Barabara.

Bi Mrindoko ameeleza kuwa kutokana na Mkoa wa Katavi kuwa miongoni mwa Mikoa Nchini iliyotabiriwa Mvua chini ya wastani ni muhimu kwa Wananchi Mkoani humo kuchukua tahadhari kwa kutunza akiba ya chakula sambamba na kupanda mbegu zinazokua ndani ya muda mfupi.

Aidha amewataka Wananchi kuzingatia utaratibu wa kujisajili kupata namba maalumu ya utambulisho ili iwe rahisi Wananchi hao kupata mbolea ya ruzuku hatua itakayosaidia Wananchi hao kulima kilimo cha kisasa cha kutumia mbolea.