Chanjo ya Polio kutolewa 18-21 Mei 2022, RC Katavi awahimiza Wananchi kutoa Ushirikiano zoezi la Utoaji wa chanjo kwa watoto.

Posted on: May 14th, 2022

Mkuu wa Mkoa wa Katavi Mh.Mwanamvua Mrindoko alipozungumza na Waandishi wa Habari  13 Mei 2022 Ofisini kwake

Na:John Mganga-IO Katavi RS 

Watoto wapatao 189,465 chini ya Miaka 5 wanatarajiwa kupata chanjo ya Ugonjwa wa Polio Mkoani Katavi ikiwa ni jiitihada za Serikali kuchukua tahadhari kufuatia  tishio la mlipuko wa Ugonjwa huo baada ya Visa kadhaa vya watoto kukutwa na maambukizi ya Polio  kuripotiwa katika Nchi jirani ya Malawi.

Hayo yameelezwa na Mkuu wa Mkoa wa Katavi Mh.Mwanamvua Mrindoko alipozungumza na Waandishi wa Habari 13 Mei 2022 Ofisini kwake ambapo ameeleza kuwa chanjo hiyo itatolewa rasmi kuanzia Tarehe 18 hadi Tarehe 21 Mwezi Mei 2022.

Mhe. Mrindoko ameeleza kuwa awali Serikali iliahirisha zoezi la utoaji wa chanjo ya Polio ili kuweka sawa maandalizi   kusudi zoezi hilo la utoaji wa chanjo liweze kutolewa kwa ufanisi zaidi kama ilivyokusudiwa.

Ameeleza kuwa Zoezi hilo litatekelezwa na  Wataalamu wa Afya kwa  kupita nyumba kwa nyumba ambapo watatoa chanjo hiyo ya matone kwa njia ya mdomo  na pia katika maeneo yote ambayo watoto watapatikana.

Aidha Mh.Mrindoko  amewahakikishia Wananchi wote kuwa Chanjo ya Polio inayotolewa ni salama na haina madhara yeyote na kwamba kwa wale wote wenye maswali wanapaswa kuwauliza wataalamu wa Afya waliopo katika maeneo mbalimbali katika  Vituo vya kutolea hduma za Afya.

Amekemea vikali tabia ya Wananchi wanaopotosha Taarifa mbalimbali kuhusu Chanjo ambapo ameeleza kuwa serikali  haitosita kuchukua hatua za kinidhamu kwa wale wote watakaobainika kupotosha Taarifa za Chanjo.